أثارت الإعلامية سارة نخلة جدلًا كبيرًا خلال برنامجها “آخر اليوم” على قناة “هي”، بعد هجومها على تصريحات الفنان لطفي لبيب في إحدى المقابلات الإعلامية، والتي انتقد فيها عددًا من زملائه النجوم، من بينهم الزعيم عادل إمام، والفنان محمد رمضان، وعلي ربيع.

سارة نخلة عن لطفي لبيب: ازاي فنان كبير زيه يطلع مع مذيع كل هدفه إثارة الجدل

وقالت سارة نخلة في تصريحات رصدها موقع تحيا مصر: أنا بحب لطفي لبيب وبيضحكني جدًا، دمه خفيف وناس كتير بتحبه، لكن مش فاهمة إزاي فنان كبير زيّه يقبل يطلع في مقابلة مع مذيع هدفه الوحيد إثارة الفتنة بين النجوم المصريين، وكل أسئلته مليانة سم، عشان ياخد تصريح ضد فنان زميل. يعني إيه أنا أطلع أقول: أنا بضحك أكتر من عادل إمام؟!

وأضافت: الزعيم عادل إمام عنده 50 سنة من الشغل المتواصل اللي عمل فيه كل أنواع الفن، من الكوميديا للدراما للتراجيديا، والناس بتحبه مش بس في مصر، لكن في كل الوطن العربي. إزاي ممكن يتقال إن التمثيل بتاعه مش كوميدي؟ دي رحلة عظيمة لا يمكن نلغيها بتصريح غير مسؤول”.

سارة نخلة: محمد رمضان عامل نجاحات كبيرة.. ليه نطلع نهاجم! 

وانتقدت سارة نخلة أيضًا تصريحات لطفي لبيب عن الفنان محمد رمضان، قائلة: بعد ما خلصنا من الزعيم، نروح على محمد رمضان ونقول إنه مش موهوب وإن تمثيله عشوائي؟! محمد رمضان عامل نجاحات كبيرة وجمهور بيحبه، ليه نطلع نهاجم بعض بالشكل ده؟”.

كما علّقت على رأيه في علي ربيع قائلة: مسرح مصر كان بيجيب مواسم ورا مواسم والناس كانت بتضحك، مش بتيجي تعيط، فإزاي نقول إن علي ربيع مش كوميديان؟.

سارة نخلة توجه رسالة قاسية لنزار الفارس

وتطرقت بحديثها عن نزار الفارس، قائلة: الموضوع مش جديد، نفس الإعلامي ده استضاف قبل كده فنانين زي حورية فرغلي ورانيا يوسف، ووقعهم في فخ أسئلته المستفزة. المشكلة مش بس في الأسئلة، لكن كمان في طريقة المونتاج اللي بتسبب تحريف كلام الفنانين وإثارة الجدل على حساب مصداقيتهم واسئلته كلها سم".

وأضافت: فنانين كتير لما شافوا إن كلامهم اتلعب فيه، زي حورية فرغلي، خرجوا وصححوا الموقف، لكن للأسف في ناس بتقبل الفخ ده مقابل الفلوس وبتسكت، وده شيء يضر الفنان نفسه قبل أي حد”.

واختمت سارة نخلة حديثها برسالة مباشرة للفنانين: الفنان لازم يحترم زميله وتاريخه، والتصريحات اللي تهاجم زملاءك بتضر بصورتك قبل ما تضرهم. إحنا محتاجين إعلام يحترم المصداقية ويوقف النوع ده من الفتن.