الأحد 12/يناير/2025 – 03:00 م

كشفت هبة أيمن، زوجة اللاعب إبراهيم شيكا، لاعب فريق الزمالك السابق، المصاب بالكانسر، عن تطورات الحالة الصحية للاعب. 

وكتبت زوجة اللاعب على حسابها عبر فيس بوك: هكتبلكم حاجة سريعة كده عن حياتي، ابني اللي مفروض يدخل أولى ابتدائي مدخلش بنتي مفروض في حضانة مش بتتحرك من البيت ولولا وجود أمي جنبي الفترة دي مش عارفة كنت هعمل إيه، أمي اللي سايبه شغلها وحياتها وقاعدة بولادي وبسبب ده شقتها اتسرقت مش بس كده محدش عايش فينا حياة طبيعية ليلنا نهار ونهارنا ليل والناس علي قد رفع سماعة التليفون مبقاش حتى بيحصل ده والطمع من كل اللي حواليك ويقولك آه ومعاكو فلوس والدنيا حلوة وإيه كلام بيتقال وافتراء وحسبي الله ونعم الوكيل، والواحد شاكر وحامد ربنا واللي ميعرفش ده كله ليه ده كله عشان أساس بيتنا تعب. 

وأضافت: الكانسر هاجم حياتنا في آخر 2023 وقل لن يصيبنا إلا ما كتب الله لنا راضيين بس تعبنا سنة راحت من عمرنا في تعب ووجع وعياط وانهيار في إهمال وضغط وتعصيب سنة صعبه سنة خسرت فيها طوب الأرض، وعرفت إن السند هو الله وأن الناس عاوزك وانتا واقف على رجلك، أول ما تقع هتلاقي كل الناس الي في حياتك مع ناس تانية وبجد وضع لا أتمناه لأعدائي في بجد الحوار مش ناقص كل شويه انتقادات وضغط من معظم الناس اللي حواليا من أهل وأصحاب وناس متعرفنيش غير من الميديا الراحمون يرحمهم الله. 

اختتمت: أتمنى ترحموا متعرفوش حاجة عن حياه الشخص أنا بطلع اتكلم واظهرلكم حاجات بس في مليون حاجة مستخبية فادعولنا نطلع من الفترة دي وبيتي يعيش حياة طبيعية زي الناس ويشفي إبراهيم ويعافيه ويرجع الصحة والعافية لجسمه تاني لأن حقيقي تعب واتبهدل بدنيا ونفسيا وبنعافر من القدر ومع المرض ومع الخذلان ومع الأذى النفسي، فاللي ميعرفش حاجة يبطل هبد والموضوع في إيد ربنا هو يعلم وأنتم لا تعلمون.