09:15 المشاهير العرب تامر حسني يحث محبيه على الصلاة ويؤكد : كانت السبب في وصولي الى أحلامي

شاركت الفنان المصري تامر حسني فيديو يتحدث فيه عن أهمية الصلاة وقال : "والله والله اللي بيقوله صح أنا مش شيخ ولا عامل بنصح أنا بتكلم عن حاجات مريت بيها في حياتي و كانت من أسباب وصولي لحلمي إتمسك بالصلاه أيا كنت بتعمل إيه و اوعى تقول ربنا مش هيقبل صلاتي و اوعى تصدق اللي يقولك كده إوعى تحكم إنت على ربنا وتشك في رحمته إنه مش هيقبل لا لااااااا دا غلط كبير ربنا أكرم و أرحم من ما تتخيل و مهما أي غلط بتعمله مسير صلاتك تخليك تقلل أخطاء و واحده واحده لحد ما تبقى في المسار السليم اللي برضو هيكون فيه أخطاء ولكن أقل و يتبعها إستغفار و تصدق و توبه".

وتابع: "حتى لو رجعت تاني لنفس الأخطاء و رجعت عاشر و مليون إرجع تاني و مليون لربنا وأطلب منه العفو و المغفرة المهم تخليه قدام عينك طول حياتك".

وأضاف: "خلوا بالكوا في أفكار بتسوق العالم ناحية إن الشخص المتدين أو الملتزم أو اللي محافظ على صلاته إنه يتكسف يقول ده قدام الناس لإن ممكن أصحابه يضايقوه بالكلام بما إن الجانب الشيطاني بقى قوي أوي في العصر ده بس إحنا لازم نقاوم النوع ده من الفكر ونفتخر إننا بنصلي و بنركع لواحد بس و هو الله سبحانه و تعالى و مهما علا شأننا و مهما عملنا ذنوب بنركع برضو و بنتوب و نستغفر ونشكره على كل حال و نطلب منه اللي بنحلم بيه ونثق إنه هيرزقنا إذا كان بيرزق الجنين في بطن أمه و النمله في جحرها و الطيور في السما".